Мақомоти милитсияи пойтахт аз боздошти овозхон ва блогер Ганҷина Хайракова, ки бо тахаллуси Ганҷинабону ҳунарнамоӣ мекунад, хабар додааст.

Хайракова Ганҷина Ҷамшедовна, сокини 28-солаи ноҳияи Кӯшониён, дар асоси муроҷиати сокинон аз ҷониби кормандони шуъбаи кофтукови ҷиноятии Раёсати ВКД дар шаҳри Душанбе дастгир шудааст. Ба таъкиди мақомот, ӯ ҳангоми пахши мустақим дар шабакаҳои иҷтимоӣ бо дашному алфози қабеҳ суханронӣ намуда, нисбати дигар шаҳрвандон беэҳтиромӣ зоҳир менамудааст.

Милитсияи пойтахт гуфт, нисбати Ганҷина маводди зарурӣ тартиб дода шуда, барои чораҷӯӣ ба суд ирсол карда шудааст. Маълум нест, ки ӯ аз рӯи кадом банд ба кадом навъи муҷозот маҳкум мешавад.

Мақомоти милитсия саҳифаҳои блогеронро месанҷад ва бештари онҳо барои дашному ҳақорат дар пахшҳои мустақим боздошт гашта, ҷарима ва ҳабси маъмурӣ шудаанд.