Дар Хатлон як марди 38-соларо бо гумони қаллобию мардумфиребӣ боздошт намудаанд. Дар хабар гуфта мешавад, ки боздоштшуда худро корманди милитсия муаррифӣ намуда, одамонро гӯл мезадааст ва пулу моли онҳоро бо роҳи фиреб аз худ мекардааст.
Ғолибшоҳ Бурҳонов сокини ноҳияи Вахш буда, бо даъвои сокинони навоҳии Вахш ва Ҷайҳун боздошт шудааст. Тибқи иттилои Вазорати умури дохилии кишвар, шуруъ аз моҳи марти соли равон Бурҳонов худро корманди мақомот муаррифӣ намуда, бо ваъдаи аз аскарӣ озод намудан аз як сокини ноҳияи Вахш 10 000 сомонӣ, бо баҳонаи ҷарима аз шаҳрванди дигар боз 10 000 сомонӣ гирифтааст. Номбурда ба як шахси дигар ваъда кардааст, ки дар гирифтани маъюбӣ барояш кумак мерасонад ва аз вай 1 100 сомонӣ маблағ гирифтааст. Дар хабар гуфта мешавад, ки Ғолибшоҳ Бурҳонов ҳамчунин мошини тамғаи “Жигули” -и як сокини ноҳияи Ҷайҳунро аз худ намуда, то ҳол пули мошинро ба соҳибаш надодааст.
Бурҳонов дар ягон ҷо кор намекунад ва пулҳои бо роҳи макру фиреб аз одамон гирифтаашро барои ниёзҳои худ сарф мекардааст.
Нисбати Ғолибшоҳ Бурҳонов бо қисми 2-и моддаи 247-и Кодекси ҷиноятии Ҷумҳурии Тоҷикистон парвандаи ҷиноятӣ оғоз ёфта, тафтишот идома дорад.
Милитсияи вилояти Хатлон аз шахсоне, ки ба доми фиреби ин мард афтодаанд, хоҳиш кардааст, ки ба шуъбаҳои милитсия дар ҷойи зисти худ муроҷиат намоянд.
