Кормандони мақомоти милитсия бародарон Нуралӣ ва Дилшод Мадаминовҳоро бо гумони латукӯби бераҳмонаи янга ва ҷиянашон боздошт намудаанд. Дар ин бора Раёсати ВКД дар вилояти Хатлон хабар додааст.
Нуралӣ ва Дилшод Мадаминов ҳарду сокини ноҳияи Ҷалолиддин Балхии вилояти Хатлон буда, дар латукӯби ҳамсари бародарашон ва духтари ӯ муттаҳам дониста мешаванд. Сабаби моҷаро маълум нест, вале тибқи иттилои манбаъ, боздоштшудагон Нуралӣ Мадаминов ва Дилшод Зокиров ба манзили бародарашон ворид шуда, ӯро таҳдид ва аъзои хонаводаашро латукӯб кардаанд. Духтар бар асари латукӯби амакҳояш ҷароҳатҳои вазнини ҷисмонӣ бардошта, дар беморхона бистарӣ шудааст.
Айни замон нисбати Нуралӣ ва Дилшод Мадаминов барои «қасдан расонидани зарари вазнин ба саломатӣ» парвандаи ҷиноятӣ оғоз ёфтааст ва тибқи ин банди қонун ба гумонбарон аз 8 то 12 сол зиндон таҳдид менамояд.
