Ду ҷавони сокинони ноҳияҳои Фархор ва Восеи вилояти Хатлон бо гумони дуздии 18 сар асп дастгир шудаанд.
Бино ба иттилои Раёсати ВКД дар вилояти Хатлон, ин нафарон Маҳмуд Ораеви 26-сола ва Холмуҳаммад Оралови 28-сола буда, дар 8 ҳолат 18 аспи сокинони Хатлонро рабуда, ба соҳибони чорво дар умум ҳудуди 330 ҳазор сомонӣ зарар расонидаанд. Маълум нест, ки боздоштшудаҳо ба ин гуфтаҳои мақомот чӣ назар доранд.
Бар зидди боздоштшудагон бо иттиҳоми “дуздӣ ба миқдори калон” (моддаи 244, қисми 3, банди “а” КҶ) парвандаи ҷиноятӣ боз шудааст, ки аз 8 то 12 соли зиндон ҷазо пешбинӣ мекунад.
