Кормандони милитсия дар шаҳри Душанбе 2 ҷавони 17-соларо бо гумони авбошӣ дастгир кардаанд, ки дар кордзанӣ муттаҳам дониста мешаванд. Дар ин бора Вазорати умури дохилии кишвар хабар додааст.
Яке аз боздоштшудагон зодаи ноҳияи Шуғнон буда, рӯзи 30-юми марти соли равон, тахминан соатҳои 12:30 дар наздикии бинои Сирки давлатӣ бо як бачаи 14-сола ҷанҷол карда, дар рафти моҷаро ӯро корд задааст.
Ҳодисаи дуюм низ субҳи ҳамон рӯз, соатҳои 10:20 сар зада, як ҷавони 17-солаи сокини шаҳри Душанбе дар кӯчаи Севастополская бо ҷавони ҳамсинну соли худаш, ки аз шаҳри Хуҷанд мебошад, ҷанҷол намуда, ба шиками рақибаш бо корд задааст.
Ҷабрдидагон бо ҷароҳатҳои ҷисмонӣ ба бемористон интиқол дода шуда, тафтишоти ин ду қазия аз ҷониби мақомоти ҳифзи ҳуқуқ идома дорад.
