Кормандони милитсия дар шаҳри Душанбе як марди 35-соларо дастгир намудаанд. Алишер Туманов дар куштори бераҳмонаи ҳамсараш гумонбар дониста мешавад.
Тавре ВКД хабар додааст, дар рӯзи иди бонувон, санаи 8-уми марти соли равон байни Алишер Туманов ва ҳамсараш Абдуллоеваи 29-сола аз рӯйи рашк ва бадбинӣ ҷангу ҷанҷол сар зада, дар рафти моҷарои оилавӣ мард занашро зери латутӯби шадид қарор додааст. Дар натиҷа зан ҷароҳатҳои вазнини ҷисмонӣ бардошта, баъди 3 рӯз, санаи 11-уми март дар беморхона аз олам гузаштааст.
Мард иқрор шудааст, ки он рӯзи наҳс маводи нашъаовари навъи метаамфитамин истифода бурда, дар ҳолати бехудӣ ҳамсарашро задааст.
Нисбати боздоштшуда бо моддаи 110-и Кодекси ҷиноятии Тоҷикистон барои қасдан расонидани зарари вазнин ба саломатӣ парвандаи ҷиноятӣ оғоз шуда, тибқи ин банди қонун ба ӯ аз 5 то 15 сол зиндон таҳдид мекунад.
Тӯли як моҳи охир ин сеюмин ҳодисаи куштори зан ба дасти шавҳар мебошад, ки расонаӣ шуд. Рӯзи 2-юми март як марди 58-солаи сокини шаҳри Истаравшан бо гумони кордборон карда куштани ҳамсари 52-солааш ва санаи 3-юми март як марди 41-солаи сокини ноҳияи Рӯдакӣ бо гумони куштори ҳамсари 32-солааш боздошт шуда буданд.
