Дар доираи фаъолиятҳои хайриявӣ аз ҷониби Филиали Ҷамъияти Ҳилоли Аҳмари Тоҷикистон дар шаҳри Хуҷанд ба заҳматкаши давраи Ҷанги Бузурги Ватанӣ Раҳмонова Қутфинисо аробачаи маъюбӣ тақдим карда шуд.

Бино ба иттилои Филиали ҶҲАТ дар вилояти Суғд, қаблан Раҳмонова Қутфинисо зимни аёдат ба кормандони Филиали ҶҲАТ дар шаҳри Хуҷанд муроҷиат намуда, бо дархости дастрас намудани аробачаи маъюбӣ арзи ниёз карда буд. Бо фароҳам омадани имконият ва дар натиҷаи талошҳои пайвастаи кормандони филиал, инчунин аз ҳисоби маблағҳои хайриявие, ки тавассути сокинон ва ҳамкорон ҷамъоварӣ гардидааст, аробачаи маъюбӣ дарёфт ва дар манзили истиқоматиаш ба ӯ аз ҷониби котиби иҷроияи Филиали ҶҲАТ дар шаҳри Хуҷанд Комилов Мирислом расонида шудааст.

Зикр мегардад, ки Раҳмонова Қутфинисо аз заҳматкашони давраи ҷанг буда, солҳои зиёд дар ақибгоҳ барои таъмини фронт бо ғизо ва маҳсулоти зарурӣ саҳми худро гузоштааст.