Як сокини 34-солаи ноҳияи Бобоҷон Ғафуров бо гумони таҳдиди куштан ё расонидани зарари вазнин ба саломатии модари 67-солааш боздошт шудааст.
Вазорати корҳои дохилии Тоҷикистон хабар додааст, ки Абдуҷалол Ҳакимов шаби 15 ба 16-уми август дар ҳолати мастӣ ба манзили истиқоматии модараш рафтааст. Ба иттилои вазорат, гумонбар «бинобар нофаҳмиҳои оилавӣ» бо истифода аз корд модарашро ба куштан ё расонидани зарари вазнин таҳдид кардааст. Мақомот ҷузъиёти нофаҳмиҳои оилавии байни модару писарро шарҳ надодаанд. Ҳамчунин, мавқеи Ҳакимов дар робита ба иттиҳоми мазкур маълум нест.
Аз рӯйи ин ҳолат нисбати ӯ бо гумони содир намудани ҷинояти дар моддаи 120-и Кодекси ҷиноятии Тоҷикистон пешбинишуда парвандаи ҷиноятӣ оғоз шудааст. Тибқи ин модда, барои таҳдиди куштан ё расонидани зарари вазнин ба саломатӣ ҷазо то ду соли маҳрум сохтан аз озодиро пешбинӣ мекунад.
