Қабл аз моҳи шарифи Рамазон ман бо духтаре, ки дӯст медоштам, фотеҳа шудем. Гапзанон шуда буд, баъди ид тӯй шавем. Вале бибии духтар гуфтааст, ки дар мобайни ду ид тӯй кардан мумкин нест. Акнун мехоҳанд тӯйи моро баъди иди Қурбон гузаронанд. Ҳол он ки барои тӯй мо омода ҳастем.
ШАМСИДДИН, ш. Панҷакент
Посух:
- Ин хурофот аст. Ба чунин ҳарф бовар накунед. Маълум нест, ки дар байни мардуми мо бехосият будани никоҳи миёни идайн аз куҷо пайдо шуда бошад, баръакс, никоҳи байни ду ид хуб аст. Паёмбари ислом ҳазрати Муҳаммад (с) бо модаралмуъминин Оишаи сиддиқа (р) дар байни ду ид хонадор шудаанд.
Бинобар ин, бародари азиз, шумо баҳузур баъди ид тӯятонро баргузор кунед. Мо барои хушбахтии шумо дуо мекунем.
