Ҷанҷолу занозании як гурӯҳ наврасону ҷавонон дар шаҳри Душанбе оқибатҳои фоҷиаборро дар пай дошт. Бар асари ин моҷаро 1 ноболиғ ба ҳалокат расида, 2 нафари дигар захмӣ шудаанд.
Ин ҳодисаи нохуш дар кӯчаи Аҳмади Дониши пойтахт рӯй дода, як гурӯҳ ҷавонон байни худ ҷанҷол ва занозанӣ кардаанд. Дар рафти моҷаро 1 ноболиғ аз захми корд ба ҳалокат расида, 2 ноболиғи дигар захмӣ шудаанд.
Тавре Раёсати ВКД дар шаҳри Душанбе хабар додааст, дар пайи ин моҷарои хунин аз ҷониби кормандони милитсия як ҷавони 21-солаи сокини пойтахт боздошт шудааст, ки дар ташкил кардани занозанӣ ва 3 ноболиғро корд задан гумонбар дониста мешавад.
Гуфта мешавад, ки ин ҷавони 21-сола бо корди хурди кисагӣ - финка ба ноболибғон ҳамла карда, 3 нафарро захмӣ кардааст.
Мутаассифона, яке аз ноболиғон аз захми корд ба ҳалокат расида, 2 нафари дигар бо захми корд дар беморхонаи “Ёрии таъҷилӣ” қарор доранд.
Дар маҷмуъ аз ҷониби кормандони милитсия 6 нафар ҷавонону наврасон дар робита бо ин ҷанҷоли хунин дастгир карда шудаанд. Нисбати боздоштшудагон бо моддаҳои 110 («Қасдан расонидани зарари вазнин ба саломатӣ) ва 237 («Авбошӣ)-и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шудааст. Тибқи моддаи аввал ҷазо дар намуди маҳрум намудан аз озодӣ ба муҳлати аз 5 то 8 сол муқаррар шудааст. Барои авбошӣ бошад, аз 7400 то 14800 сомонӣ ҷарима ё ҷалби муҷрим ба корҳои маҷбурӣ ба муҳлати аз 60 то 120 соат пешбинӣ шудааст.
