Раиси вилояти Суғд Раҷаб Аҳмадзода дар шаҳри Хуҷанд бо фаъолияти як қатор корхонаҳои саноатӣ шинос гардидааст.
Бино ба иттилои дафтари матбуоти раиси вилояти Суғд, зимни боздид таъкид шудааст, ки фаъолияти босамари корхонаҳо ба таъмини ҷойҳои нави корӣ, афзоиши ҳаҷми маҳсулоти ватанӣ ва таҳкими иқтидори содиротии минтақа мусоидат мекунад.
Гуфта мешавад, ки дар Ҷамъияти дорои масъулияти маҳдуди «Ситораи тоҷ» дӯхти либосҳои махсуси корӣ ба роҳ монда шуда, маҳсулоти корхона ба хориҷи кишвар содирот мегардад. Дар Ҷамъияти дорои масъулияти маҳдуди «Лидер» бошад, мутобиқ ба стандартҳои байналмилалӣ шимҳои ҷинс бо бренди «Ҷадид» истеҳсол карда мешаванд, ки 99 фоизи таркиби он аз пахта иборат аст.
Раиси вилоят ҳангоми шиносоӣ бо фаъолияти корхонаҳо зарурати бунёди чунин сехҳои дӯзандагиро таъкид намуда, масъулинро вазифадор кардааст, ки ба рушди истеҳсолот ва содироти маҳсулоти ватанӣ таваҷҷуҳи бештар зоҳир намоянд.
