Таътили тобистона вақти истироҳату фароғат аст, аммо ин маънои онро надорад, ки кӯдакон аз дониш дур бимонанд. Агар дар ин фасл омӯзиши сабук ва шавқоварро бо бозиву сайругашт омехта намоем, на танҳо донишашон кам намешавад, балки қобилиятҳои навро низ фаро мегиранд.
Падару модарон метавонанд аз ин фурсати қулай барои рушди фикрӣ, забонӣ ва эҷодии фарзандонашон истифода баранд.
Барномаи шавқовар тартиб диҳед
Тобистон — фасли афзоиши таҷриба аст, на фаромӯшии дониш! Барои он ки кӯдаконатон дар айёми таътили тобистона аз дониш бебаҳра намонанд, бояд барнома ва муҳити муносибе барои омӯзиши сабук, шавқовар ва фароғати онҳо омода созед. Чанд тавсияи муҳимро дар ин боб ба шумо пешниход месозем. Муттаваҷеҳ бошед:
1. Риояи реҷаи рӯз
Ҳар рӯз барои фарзандонатон вақту соатҳои муайянро барои хондан, бозӣ ва истироҳат ҷудо намоед. Бовар кунед, ҳатто 30 дақиқа омӯзиши сабук метавонад барои васеъ гаштани дониш ва ҷаҳонбинии кӯдакон кӯмак расонад.
2. Кӯдаконро ба китобхонӣ шавқманд созед
Барои кӯдакон китобҳои шавқовари ба синну солашон мувофиқ харида, онҳоро ба китобхонӣ шавқманд созед. Ҳар рӯз як қисмати китобро бо ҳам хонед ва муҳокима кунед. Ин кӯмак мекунад, ки кӯдак ба мазмуни китоб беҳтар сарфаҳм равад ва онро дарк намояд.
3. Бозиҳои таълимӣ ташкил намоед
Ба кӯдакону наврасон бо роҳи бозӣ ҳама гуна илму донишро фаҳмондан осонтар аст. Аз бозиҳое истифода баред, ки малакаҳои математикӣ, забонӣ ва мантиқиро инкишоф медиҳанд.
4. Барномаҳои рақамӣ ва курсҳои онлайн
Кӯмак расонед, ки фарзандонатон дар курсҳои кӯтоҳи таълимии онлайнии мувофиқ иштирок кунанд, масалан, омӯзиши забони англисӣ, руси, олмони ва ғайра.
5. Фаъолиятҳои эҷодӣ ва амалии хонагӣ
Кӯдаконро бо корҳои эҷодӣ машғул созед, аз ҷумла расмкашӣ, қолинбофӣ, сохтани чизҳои гуногун бо даст.
6. Сайругашт ва омӯзиши амалӣ
Бо баҳонаи сайругашт ба боғ, осорхона, кӯҳ ё сайри маконҳои таърихӣ равед, то кӯдакон таассуроти нав бигиранд. Ҳангоми чунин сайругашт бачаҳо дар баробари фароғат дониш ҳам мегиранд.
7. Ҳал кардани масъалаҳо ва супоришҳо
Мушкилоти оддии риёзӣ, забонӣ ё илмиро ба онҳо ҳамчун бозӣ пешниҳод кунед.
8. Ширкат дар маҳфилҳо ва курсҳои тобистона
Агар имкон бошад, дар давраи таътили тобистона фарзандонатонро ба маҳфилҳои омӯзишӣ ё омӯзишгоҳҳо равона кунед.
