Бо фарорасии баҳор бонувон аз сурхшавӣ, пӯстпартоӣ, ё баръакс равғанӣ гаштани пӯсти рӯяшон шикоят мекунанд. Чӣ бояд кард? Рӯзи худро аз қабули витаминҳо сар мекунем. Витаминҳои А, Е ва С витаминҳои зебоӣ маҳсуб ёфта, коркарди коллагенро дар пӯст ба эътидол меоранд ва ба чеҳраи шумо таровату зебоӣ мебахшанд.
Пӯстатон хаста аст?
Пӯсти хасташуда танҳо бо молидани малҳами нармкунанда ҷон намегирад. Барои он ки чеҳраатон ботароват гардад, шумо бояд дар як шабонарӯз на камтар аз 1,5 литр оби тоза нӯшед. Ҳангоми оббозӣ дар зери оби гарм зиёд рӯйятонро нашӯйед, зеро зуд хушк мегардад.
Баъди аз сар гузаронидани сармо пӯст беҷону ҳассостар шуда, пӯстпартоӣ сар мешавад. Барои зудтар рафъ шудани пӯстпартоӣ аз скрабу пилинг истифода баред. Пӯсти равғанӣ ва омехтаро ҳафтае як маротиба, пӯсти хушкро моҳе 2-3 маротиба тоза кардан мумкин аст.
Аллергия доред?
Косметологҳо тавсия медиҳанд, ки бо фаро расидани фасли гармо малҳамҳои вазнинро ба малҳамҳои таркибаш сабуктар иваз кунем. Фаромӯш накунед, ки дар ин давра пӯст хеле ҳассосу нозук шуда, дарҳол пур аз доғу сурхӣ мегардад. Барои он, ки бо чунин мушкилиҳо рӯ ба рӯ нагардед, танҳо аз косметикаи санҷидашуда ва боэътимод истифода баред, ва дар сурати баромадани доначаҳо дар рӯй, сурх шудани пӯст, пӯстпартоӣ, хориш, ва дигар эҳсосотҳои ногувор дарҳол ба табиб муроҷиат кунед.
Илоҷи пӯсти дағал
Пӯсти дағалгаштаи дасту гарданро бо малҳамҳои нармкунандаю ғизобахш мулоим кунонидан мумкин аст. Малҳамҳоеро интихоб кунед, ки дар таркибашон ниасинамид, ҷавҳари гикол, ҷавҳари растанӣ, равғани растанӣ ва антиоксидантҳо вуҷуд дошта бошад. Фаромӯш насозед, ки зебоӣ бояд аз вуҷуди инсон сарчашма гирад. Барои ҷавону зебою пуртароват мондан, шумо бояд масунияти бадани худро баланд бардошта, пӯстатонро аз нурҳои офтоб ҳифз кунед.
Дар фаслҳои тирамоҳу зимистон пӯсти инсон чарби зиёде мебарорад, ва дар натиҷа сӯрохиҳои хурди пӯст маҳкам мешаванд. Аз ин нуқтачаҳои ҳуснгудоз дар амон мондан хоҳед, саҳару бегоҳ пӯсти рӯятонро ҳатман тоза карда, ҳеҷ гоҳ бо косметика хоб наравед.
Интихоби малҳам
Дар фасли баҳор бар асари нурҳои офтоб ва баъзе ҷузъиётҳои ороишоти косметикӣ дар рӯйи баъзе бонувон доғҳо пайдо мешаванд. Барои он ки рӯятон тозаву озода бимонад, аз истифодаи малҳамҳои косметикие, ки дорои моддаи бергаптен ҳастанд, худдорӣ намоед. Малҳами рӯзонаи шумо бояд дорои синк буда, дараҷаи аз нурҳои зарарноки офтоб муҳофизатиаш беш аз 25 бошад.
