Тоҷикистон ва Қазоқистон ҳамкориро
дар соҳаи зеҳни сунъӣ рушд медиҳанд
Агентии инноватсия ва технологияҳои рақамии назди Президенти Ҷумҳурии Тоҷикистон бо Вазорати зеҳни сунъӣ ва технологияҳои рақамии Ҷумҳурии Қазоқистон оид ба ҳамкорӣ дар соҳаи зеҳни сунъӣ Ёддошти тафоҳум ба имзо расонид.
Ҳуҷҷати мазкур дар доираи сафари расмии Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Қазоқистон пас аз анҷоми музокироти сатҳи олии Тоҷикистон ва Қазоқистон бо иштироки сарони давлатҳо муҳтарам Эмомалӣ Раҳмон ва муҳтарам Қосим-Жомарт Токаев ба имзо расида, ба таҳкими ҳамкориҳои дуҷониба дар самти рушди технологияҳои зеҳни сунъӣ, табодули донишу таҷриба ва татбиқи лоиҳаҳои муштарак равона гаштааст.
Гуфта мешавад, ки минбаъд ба масъалаи рушди зеҳни сунъии бехатар ва масъулиятнок, ҳифзи маълумоти шахсӣ, таъмини амнияти иттилоотӣ ва киберӣ, дастгирии стартапҳо ва татбиқи технологияҳои муосир таваҷҷуҳи махсус зоҳир мегардад.
Бо мақсади ҳамоҳангсозии фаъолияти ҷонибҳо ва таъмини татбиқи амалии мувофиқаҳо таъсиси гурӯҳи кории муштарак пешбинӣ гардида, тавассути табодули коршиносон, баргузории конференсияҳо, машваратҳои корӣ ва татбиқи лоиҳаҳои муштараки таҳқиқотӣ, таълимӣ ва озмоишӣ ҳамкорӣ ба роҳ монда мешавад.
