Барои сокинони деҳаи Дар-дари ноҳияи Айнӣ, ки бар асари офати табиӣ манзили истиқоматиашон қисман ё пурра вайрон шуда буд, хонаҳои нави замонавӣ бунёд карда истодаанд. Аз рӯи лоиҳаи пешниҳоднамудаи Кумитаи меъморӣ ва сохтмони назди Ҳукумати Ҷумҳурии Тоҷикистон аз ҷониби мақомоти иҷроияи ҳокимияти давлатии ноҳияи Айнӣ барои осебдидагони сел 15 хонаи 4 ҳуҷрагӣ сохта мешавад.
Ба хотири ошноӣ бо рафти корҳои сохтмонӣ як ҳайъати махсус аз Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон бо сарварии генерал-майор Ҷамшед Камолод аз ин мавзеъ дидан карданд. Ба иттилоъи Кумитаи ҳолатҳои фавқулода, корҳои сохтмонӣ босуръат идома дошта, дар 11 хона бому болопӯш ва дар 3 хона бардоштани девор пурра ба анҷом расидааст, дар 1 хонаи дигар кор давом дорад. Айни замон дар хонаҳои мазкур корҳои андоваи дохили биноҳо ҷараён дорад.
Тибқи фармоиши Комиссияи давлатии Ҳукумати Ҷумҳурии Тоҷикистон оид ба ҳолатҳои фавқулодда аз 10- сентябри соли 2024 маводи хӯрока ва ғайрихурока, инчунин масолеҳи сохтмонӣ барои 7 хонаи пурра ва 8 хонаи қисман зарардида ба пуррагӣ дастрас шудааст. Муассисаи таҳсилоти миёнаи умумии №12-и ноҳия, ки аз офати табиӣ зарар дида буд, пурра барқарор шуда, аз 1 сентябри соли 2024 ба фаъолият шуруъ намудааст.
Рӯзи 3- октябр Раиси вилояти Суғд Раҷаббой Аҳмадзода аз рафти корҳои сохтмонӣ дар маҳаллаи навбунёд дидан намуда, ҷиҳати вусъат бахшидан ба корҳои сохтмонӣ ва пайваст намудани хатти барқ бо насби сутунҳо, мумфарш кардани роҳи маҳаллаи навбунёд, инчунин сохтмони низоми гармидиҳӣ бо ангишт ба масъулини вилоятӣ ва ноҳиявӣ дастуру супоришҳо дод.
Раиси вилояти Суғд супориш дод, ки корҳои сохтмонӣ то 15 октябри соли 2024 ба анҷом расонида шуда, 16- октябри соли 2024 маросими ба истифода супоридани хонаҳои навбунёд пешбинӣ гардад.
