Прокуратураи генералии Тоҷикистон барои тақсими ғайриқонунии замин ва худсарона ишғол кардани он дар шаш моҳи соли равон нисбати 133 мансабдор парвандаи ҷиноятӣ боз намудааст.

Дар ин хусус прокурори генералии Тоҷикистон Ҳабибулло Воҳидзода зимни нишасти матбуотӣ хабар дода гуфт: “Аз 133 нафаре, ки дар робита бо тақсимоти замин нисбаташон  парвандаи ҷиноӣ оғоз ёфтааст, 14 нафарашон кормандони ҳукуматҳои маҳаллӣ буда, 7 нафарашон дар вазифаи муовини раиси шаҳр ё ноҳия кор мекарданд. 29 корманди ҷамоати шаҳраку деҳот, 52 корманди Кумитаи идораи замин, 31 роҳбари хоҷагиҳои деҳқонӣ ва корманди бойгонӣ ва 7 меъмор низ дар робита бо масъалаҳои марбут ба замин ва тақсимоти ғайриқонунии он ба ҷавобгарӣ кашида шудаанд. “