Кормандони милитсия як ҷавони 18-соларо боздошт намуданд, ки падари ӯгайашро корд задааст. Дар ин бора сомонаи ВКД хабар додааст.

- Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия ҷавони 18-солаи сокини шаҳри Душанбе бо гумони содир намудани ҷинояти авбошӣ дастгир карда шуд. Гумонбаршаванда санаи 19-уми сентябри соли 2024, тахминан соати 15:30 дақиқа дар манзили истиқоматиаш аз ҳиссиёти авбошӣ бе ягон асос бо падари ӯгаяш, марди 62-солаи сокини ҳамон ҷо ҷангу ҷанҷол намуда, бо корд раги дасти рости ӯро буридааст,- омадааст дар хабар.

Гуфта мешавад, ки ҷабрдида ҷароҳати вазнини ҷисмонӣ бардоштааст.

Аз рӯи ҳодисаи мазкур тафтишот идома дорад.