Дар фасли баҳор бархе одамон нисбат ба омилҳои берунӣ, ба монанди баъзе хӯрокиҳо, атр, гарди гулҳо, гарду хок ва дигар чизҳо ҳассосият пайдо менамоянд. Он дар шакли хориш, сӯзиш, атса, сулфа, ашки чашм ва илтиҳоби роҳҳои нафаскашӣ зоҳир мегардад. Дар тиби имрӯза ин падидаро аллергия меноманд.
Нафароне, ки ба бемории аллергия гирифторанд, бо фарорасии фасли баҳор бемориашон авҷ мегирад. Иммунитети заиф ва ирсият хатари авҷгирии аллергияро зиёд мекунад. Маъмулан аллергия пеш аз мавсими гулкунии гиёҳҳо ва дарахтон оғоз меёбад, зеро аллергенҳо дар хоки намноки аз барф обшуда, баргҳо ва алафҳои хушкида пайдо мешаванд. Дар фаслҳои баҳор ва тирамоҳ, ки чанг зиёд ва ҳар гуна ҳашарот зиёд мешаванд, гирифторони аллергия низ меафзоянд.
Нишонаҳои аллергия метавонанд дар ҷойҳои гуногуни организм пайдо шуда, аз чанд дақиқа то чанд соат давом кунанд. Нишонаҳои асосии беморӣ инҳоянд: нафаскашии душвор, сулфаи давомдор, чашмони сурхшуда, дард ва илтиҳоби буғумҳо, пайдошавии шукуфа дар пӯст, шикамравӣ, қайкунӣ ва ғайраҳо.
Аллергия метавонад аз таъсири пашми баъзе намудҳои ҳайвонот, маводи хӯроквории гуногун, чангу ғубор, доруҳо, маводи кимиёвӣ, газидани ҳашарот, гарди гулҳо ва аз таъсири офтоб низ пайдо шавад.
Одамоне, ки дигар намуди бемориҳои аллергӣ, масалан астмаи бронхиалӣ ё шукуфа (экзема) доранд, дар аксар мавридҳо аз зукоми аллергӣ низ азият мекашанд. Ҳангоми гирифторӣ ба зукоми аллергӣ шояд нишонаҳои зерин пайдо шаванд: хориш дар чашмон, дар гулӯ, дар бинӣ ва дар ком, атсазанӣ ва инчунин маҳкамшавии бинӣ, обравӣ аз чашмон, обравии луобӣ аз бинӣ, сурхшавӣ ва дарди чашмон. Дар ҳолатҳои вазнин зукоми аллергӣ метавонад хурӯҷи астма (дар одамоне, ки аз астма азият мекашанд) ва ё шукуфа (экзема)-ро ба бор орад.
Ба тавсияи мутахассисон, ин беморӣ хатарнок нест, аммо омилҳои он метавонанд ба бадани инсон зарари ҷиддӣ расонанд. Агар яке аз волидон аллергия дошта бошанд, эҳтимоли пайдоиши аллергия дар фарзандон вуҷуд дорад. Аллергия дар аксар маврид дар синни кӯдакӣ пайдо мешавад ва он бо мурури вақт афзоиш меёбад. Дар ин маврид мутахассисон кӯшиш менамоянд, ки истифодаи доруҳоро кам кунанд, зеро бояд системаи масуниятии кӯдак бо он мубориза барад.
Вақте системаи масуният ба аллергия дучор мешавад, илтиҳоб ва асабоният ба вуҷуд меояд. Аломатҳо ва нишонаҳо аз намуди аллергия вобастаанд. Аксуламалҳои аллергиявӣ метавонанд дар рӯдаҳо (системаи ҳозима), пӯст, роҳҳои нафас, чашм ва бинӣ ҷой гиранд.
Бештари инсонҳо аллергияро ҷиддӣ қабул накарда, худсарона муолиҷа мекунанд ва доруҳои зиддиалергӣ истеъмол менамоянд. Ин амали онҳо боиси пайдо гардидани бемориҳои гуногун мегардад. Дар ҳолати мушоҳида намудани нишонаҳои аллергия ҳатман ба духтури оилавӣ ё ба духтур-аллерголог муроҷиат намуда, аз санҷишҳои махсус гузаштан зарур аст. Барои пешгирӣ аз мубталоӣ ба аллергия бояд, пеш аз ҳама, қоидаҳои беҳдошти санитарию гигиенаи шахсиро риоя намуд. Инчунин тарзи ҳаёти солим, истеъмоли ғизои табиӣ ва истифодаи дурусти дорувориҳо зарур аст.
