Дар рӯзҳои таътили зимистона дар шаҳри Душанбе мусобиқаи ҷумҳуриявӣ таҳти унвони «Таътили зимистона-2025» байни кӯдакони соли таваллудашон 2012 ва 2013 баргузор гардид.
Бино ба иттилои ТВ “Варзиш”, мусобиқа ба хотири гиромидошти хабарнигори маъруфи варзишӣ Фарҳод Ҷабборов, ки солҳои тӯлонӣ ба нафъи футболи пойтахт заҳмат кашидааст, бахшида шудааст.
Мусобиқаи мазкур 1-уми январ оғоз шуда, дар охирин рӯзи таътили зимистонаи кӯдакон – 7-уми январ ба анҷом расид. Дар гурӯҳи кӯдакони то 12-сола дастаи «Душанбе-Солор» ғолиб гардид. Медалҳои нуқра насиби дастаи Мактаби ҷумҳуриявии маҳорати олии варзиш оид ба футбол гардид. Нишонҳои биринҷиро «Помир»-и пойтахт соҳиб шуд.
Дар мусобиқа байни футболбозони то 13-сола дастаи «Душанбе-Солор» ғолиби мусобиқот гардид. Ҷои дуюм насиби дастаи МҶМОВ ва зинаи сеюм аз они бачаҳои «Хоҷамбиё» шуд.
Дар маросими ҷамъбастии мусобиқа директори Лигаи футболи кӯдакону наврасони Тоҷикистон Абдулло Соқиев, директори Мактаби махсуси варзишии захираҳои олимпии шаҳри Душанбе Субҳон Хоҷамов, бародарони марҳум Фарҳод Ҷабборов - Бахтиёр ва Ҷамол Ҷабборовҳо ширкат доштанд.
