Дафтари Созмони Милали Муттаҳид дар Ҷумҳурии Тоҷикистон, Сафорати Британияи Кабир ва Ҳукумати ҶТ ба маъракаи “16 рӯзи амал алайҳи хушунати гендерӣ” бо ташкили мизи мудаввари муштарак ҳусни хотима бахшиданд.
Мизи мудаввар ба татбиқи таҳрири нави Қонуни ҶТ «Дар бораи пешгирии зӯроварӣ дар оила» бахшида шуд. Ин чорабинии муҳими сатҳи баландро муовини сарвазири ҶТ хонум Дилрабо Мансурӣ ва Ҳамоҳангсози доимии СММ хонум Парвати Рамасвамӣ ҳамраисӣ карданд.
Намояндагони сохторҳои давлатӣ, созмонҳои ҷамъиятӣ ва шарикони рушд, ки дар чорабинӣ ширкат доштанд, чаҳор самти асосии мусоидат ба баробарии гендерӣ ва пешгирии хушунати гендериро баррасӣ карданд. Ин соҳаҳо таҳкими муҳити ҳуқуқӣ, дастрасӣ ба хизматрасониҳои муҳим барои наҷотёфтагон аз хушунати гендерӣ, ҳалли меъёрҳои зараровари иҷтимоӣ ва тавонмандсозии иқтисодии занон барои баробарии гендерӣ ва коҳиши камбизоатиро дар бар мегиранд.
Чорабинии мазкур дар чаҳорчӯби лоиҳаи ЮНФПА «Осиёи Марказӣ - Фонди муттаҳидшудаи амнияти Бритониё» (ISF) бо мақсади таҳкими пешгирӣ ва вокуниш ба зӯроварӣ нисбати занон ва духтарон дар Осиёи Марказӣ баргузор гардид.
