Кормандони Агентии назорати давлатии молиявӣ ва мубориза бо коррупсия нисбати як корманди Раёсати ВКД дар Хатлон барои пора гирифтан парвандаи ҷиноятӣ боз кардаанд.

Гуфта мешавад, ки ӯ аз як шаҳрванд барои аз ҷавобгарии ҷиноятӣ озод намудани шахсе 20 ҳазор доллар талаб кардааст.

Бино ба иттилои манбаъ, Назаров Ф. З., ваколатдори оперативии шуъбачаи мубориза зидди гардиши ғайриқонунии маводи мухаддири қисми минтақавии Раёсати Вазорати корҳои дохилӣ дар вилояти Хатлон буда, бо истифода аз мақоми хидматӣ бо роҳи фиреб ба боварии шаҳрванд Х. М. даромада, аз номбурда бо ваъдаи қатъ

кардани парванда ва аз ҷавобгарии ҷиноятӣ озод намудани бародараш М. К., ки парвандаи ҷиноятии ӯ дар истеҳсолоти кормандони ШВКД дар ноҳияи Хуросон мавриди тафтиши пешакӣ қарор дошт, 20 000 доллари ИМА талаб карда гирифтааст, вале баъди гирифтани маблағ кореро анҷом надодааст.

Мақомот алайҳи Назаров бо иттиҳоми қаллобӣ бо қисми 4-и моддаи 247-и Кодекси ҷиноятии Ҷумҳурии Тоҷикистон парвандаи ҷиноятӣ оғоз намуда, пас аз тафтишоти пешакӣ онро ба суд фиристодаанд. Тибқи ин банди қонун ҷарима ё маҳрум сохтан аз озодӣ ба муҳлати то 12 сол пешбинӣ шудааст.