Шоири маҳбуб Хайриддини Хайрандеш аз ҷониби Президенти кишвар муҳтарам Эмомалӣ Раҳмон бо унвони “Шоири халқии Тоҷикистон” сарфароз гардонида шуд.
Хайрандеш ё Қурбонов Хайриддин Шарифович 4-уми апрели соли 1961 дар деҳаи Чагами Болои ноҳияи Маскав (ҳоло Ш. Шоҳин) ба дунё омадааст. Маълумоти миёнаро то синфи 9 дар зодгоҳаш гирифта, мактаби миёнаи №30-и ноҳияи Коммунистӣ (ҳоло Кӯшониён)-ро соли 1978 хатм кардааст.
Ӯ баъди хатми мактаби миёна як сол роҳбари маҳфили адабии Хонаи пионерони шаҳри Қӯрғонтеппа буд. Соли 1983 факултаи филологияи тоҷики Донишгоҳи давлатии Тоҷикистон ба номи В. И. Ленин (ДМТ)-ро хатм кард. Соли 1999 гимназияи хусусии «Хайрандеш»-ро таъсис дода, директори он буд. Ӯ муаллифи асарҳои «Хайробод», «Зиёратнома», «Сад қатра ашк», «Замзама», «Хайробод», «Тоҷикнома», «Чархофалак», «Ғазалпайванд» ва «Куллиёт» мебошад.
Аз соли 1997 узви Иттифоқи нависандагони Тоҷикистон аст ва маҳфили “Ҳамешабаҳор”-ро дар назди Китобхонаи миллии Тоҷикистон сарарӣ мекунад, ки умри 40-сола дорад. Ҳамзамон, сардабири нашрияи бачагонаи “Пайрав”, замимаи ҳафтаномаи “Омӯзгор” аст.
Ӯ дар як суҳбаташ гуфта буд, ки “агар ҳаққи муаллиф риоя шавад, шояд ҳоло миллиардери тоҷик мебудам, зеро тую маърака, радио телевизионе нест, ки сурудҳоям садо надиҳанд”.
