Дар рӯзи панҷуми 33-юмин Бозиҳои тобистонаи олимпии Париж-2024 кишвари маҳбуби мо Тоҷикистонро Комроншоҳи Устопириён зери вазни то 90 кг муаррифӣ кард.

Бино ба иттилои ТВ “Варзиш”, Устопириён дар даври аввал бо ҷудокори гурҷитаборӣ испанӣ Тристани Мосахлишвили гӯштин гирифт ва бо як имтиёзи вазарӣ шикаст хӯрда, аз идомаи рақобатҳо бенасиб монд.

Қобили зикр аст, ки ин сеюмин Олимпиада дар корномаи Комроншоҳ буд, ки ширкат варзид. Дар Бозиҳои олимпии Рио-2016 ва Токио-2020 ҳам Комроншоҳ бидуни натиҷаи назаррас баромад карда буд. Ба ҳамин тартиб, Бозиҳои олимпии Париж-2024 охирин дар корномаи Комроншоҳи Устопириён буд.

Тоҷикистон ҳоло дар Бозиҳои олимпии Париж -2024 як медали биринҷӣ дорад. Нишони биринҷиро дар рӯзи чаҳоруми Бозиҳои олимпӣ Сомон Маҳмадбеков зери вазни то 81 кг ба даст овард.