Ба имдодгарони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон муяссар шудааст, ки дар давоми як рӯз бо истифода аз барномаи мобилии SOS ду шаҳрванди хориҷии дар кӯҳҳои Помир гумшударо пайдо кунанд ва наҷот диҳанд.
Бино ба иттилои КҲФ, 9-уми сентябри соли 2024 наҷотдиҳандагони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон амалиёти навбатии наҷоти сайёҳони хориҷӣ дар кӯҳистони Помирро бомуваффақият анҷом додаанд.
- 6-уми сентябри соли 2024, соати 19:40 тавассути барномаи мобилии SOS, ки аз ҷониби мутахассисони КҲФ таҳия шудааст, хабар расид, ки сайёҳони хориҷӣ, эҳтимолан шаҳрвандони ИМА, дар кӯҳистон ба кумак ниёз доранд. Онҳо координатҳои системаи даҳӣ ва инчунин матни кӯтоҳ бо мазмуни зерин фиристоданд: «Мо дар як дараи хеле дурафтода бо ғизои кам дармондаем. Имкони хуруҷ аз ин бунбаст надорем. Дар пеши мо пули шикаста ва дар паси мо релйефи шадид аст”. Бо истифода аз координатҳои гирифташуда кормандони Кумита макони одамони дармонда ва дар ҳоли изтиробро муайян карданд. Маълум шуд, ки онҳо ду нафаранд ва дар кӯҳҳои Язгуломи ноҳияи Ванҷ раҳгум задаанд. Субҳи барвақт, 7-уми сентябри соли 2024 наҷотдиҳандагони Раёсати КҲФ дар ВМКБ иборат аз 7 нафар ва роҳбалад аз ҷумлаи сокинони ҷамоати деҳоти Язгулом ба ҷои ҳодиса сафарбар карда шуданд. Наҷотдиҳандагон соати 12:20 бо ҷабрдидаҳо тамоси овозӣ барқарор карданд, ки онҳо ду нафар ҳастанд: Ян Ноф, шаҳрванди ИМА ва Ҷоанна Фирити 27-сола, шаҳрванди Швейтсария. Рӯзи 16-уми августи соли 2024 ҳардуи онҳо бо мақсади сайёҳӣ ба Тоҷикистон омада, рӯзи 1-уми сентябр бо мошини иҷора ба ВМКБ рафтанд. Дастаи фаврии имдодгарони КҲФ пайроҳаҳои душворгузарро тай карда, миёни сахраҳои баланду теппаву дараҳо дармондагонро ҷустанд. Лозим омад 30 км роҳро пиёда тай кунанд, то ба мавзеи сайёҳон расанд. Роҳи мушкилу дур онҳоро хеле хаставу абгор карда буд. Ба гуфтаи сайёҳон, маълум шуд, ки онҳо аз 1-уми сентябр то 5-уми сентябри соли 2024 бо масири пешбинишуда - аз деҳаи Бартанги ноҳияи Рӯшон ба самти деҳаи Язгуломи ноҳияи Ванҷ ҳаракат кардаанд, вале бо сабаби он ки пул дар маҳаллаи деҳаи Зайчӣ хароб шуда буд ва онҳо қаиқ надоштанд, дар соҳили дарёи Язгулом дармондаанд. Сайёҳон дар баландии 3100 метр аз сатҳи баҳр буданд. Захираи хӯроквории онҳо тамом шуд. Маврид ба зикр аст, ки ин гардишгарон аз қабл хати ҳаракати худро бо хадамоти наҷот ҳамоҳанг накарда буданд ва як сабаби аслии раҳгум задану дучори мусибати эҳтимолӣ шудани онҳо низ ҳамин буд. Дар наҷоти онҳо танҳо барномаи мобилии SOS ва амалҳои касбӣ ва салоҳияти кормандони КҲФ мусоидат карданд. Ҷараёни корҳои наҷотро кӯҳҳои баланд ва бероҳӣ мушкил мекард. Аввалин коре, ки анҷом доданд, сайёҳони беғизо мондаву гуруснаро бо ғизо таъмин карданд. Нимаи дуюми рӯзи 8-уми сентябр наҷотдиҳандагон ба поин овардани гардишгарон оғоз карданд ва билохира соати 01:25 дақиқаи 9-уми сентябри соли 2024 ба шаҳри Хоруғ расиданд ва онҳоро ба яке аз меҳмонхонаҳои шаҳри Хоруғ ҷобаҷо карданд,- омадааст дар хабарномаи КҲф.
Дар ҳамин иртибот Кумита ба дастаҳои сайёҳӣ ва гардишгарон муроҷиат мекунад, ки қабл аз сафар бо роҳҳои кӯҳӣ самти ҳаракати худро бо хадамоти наҷот ҳамоҳанг кунанд, аз онҳо дар бораи вазъи роҳҳо, шароити обу ҳаво маълумоти дақиқ гиранд.
