Дар Донишгоҳи давлатии омӯзгории Тоҷикистон 1642 нафар шаҳрвандони хориҷӣ дар зинаҳои гуногун таҳсил мекунанд.

Ин нуктаро зимни нишасти матбуотӣ ректори донишгоҳ Аҳлиддин Ибодуллозода зикр намуда, афзуд, ки аз Ҷумҳурии Туркманистон 7 нафар, аз Ӯзбекистон 1594 нафар, аз Қазоқистон 4 нафар, аз Покистон 1 нафар, аз Афғонистон 13 нафар, аз Чин 22 нафар, аз Олмон 1 нафар ба таҳсил фаро гирифта шудаанд.

Инчунин, гуфта шуд, ки 10 нафар шаҳрвандони хориҷӣ ба сифати омӯзгор ва шунаванда дар донишгоҳ фаъолият менамоянд.

Аз Ҷумҳурии Халқии Чин 2 нафар омӯзгор ва 1 нафар шунаванда, аз Ҷумҳурии Корея 2 нафар омӯзгор, аз Ҷумҳурии Исломии Эрон 1 нафар шунаванда, аз Иёлоти Муттаҳидаи Амрико 3 нафар шунаванда дар Донишгоҳи омӯзгорӣ фаъолият менамоянд.

Қобили зикр аст, ки дар шуъбаи ғоибонаи зинаи магистратура 22 нафар шаҳрвандони Ҷумҳурии Халқии Чин таҳсил карда истодаанд.