Имрӯз Зиёдулло Абдулзода, муовини вазири маориф ва илми Тоҷикистон, зимни нишасти хабарӣ гуфт, яке аз сабабҳои асосии давлатӣ шудани Литсейи Оғохон дар шаҳри Хоруғ берун аз нақшаи таълимӣ амал кардани мудирияти мактаб ва муаллимони он аст.

Литсейи Оғохон моҳи сентябри соли 1998 дар бинои собиқ мактаби №3 (ба номи Киров), мактаби дорои таърихи бонуфуз дар Бадахшон, таъсис ёфтааст ва дар шаҳри Хоруғ фаъолият дорад.

Он аз ҷумлаи маъруфтарин муассисаҳои таълимии ВМКБ ба шумор мерафт, ки хатмкунандаҳояш дар донишгоҳҳои байналмилалӣ таҳсилашонро давом медоданд.