Сокинони деҳаи Варваи ҷамоати деҳоти Ромити шаҳри Ваҳдат, ки аз офати табиӣ зарар дида буданд, соҳиби хонаҳои нав гаштанд.
Калиди хонаҳои нави замонавиро ба сокинони ин деҳа, ки рӯзи 18-уми майи соли равон дар натиҷаи омадани сел хонаҳояшон ба пуррагӣ хароб гашта буд, муовини Сарвазири мамлакат Зиёзода Сулаймон Ризоӣ, муовини якуми раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон генерал-майор Латифзода Ҳотамшо Латиф ва раиси шаҳри Ваҳдат Исмоилзода Мирзо Иброҳим супурданд.
Сокинони деҳа ба Сарвари давлат муҳтарам Эмомалӣ Раҳмон изҳори сипосу миннатдорӣ намуданд, зеро маҳз бо дастуру супоришҳои Пешвои миллат дар муддати кӯтоҳ барои осебдидагони офати табиӣ чунин хонаҳои зебои замонавӣ бунёд карда шуданд.
Муовини Сарвазири кишвар Зиёзода Сулаймон Ризоӣ дар маҳаллаи навбунёд аз хонаҳои нав дидан карда, ба кори сохтмончиён баҳои баланд доданд.
