Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон аз ҳавои номусоиди чанд рӯзи оянда хабар дод.

Бино иттилои манбаъ, рӯзҳои 4-5-уми январи соли ҷорӣ бо сабабҳои омилҳои метеорологӣ дар ҷумҳурӣ ҳавои ноустувор боқӣ монда, боришоти барф дар назар буда, 4-уми январ дар минтақаҳои алоҳидаи ноҳияҳои тобеи ҷумҳурӣ, вилояти Хатлон ва ғарби Вилояти Мухтори Кӯҳистони Бадахшон (ВМКБ) баъзан ҳолатҳо бошиддат меборад. Рӯзҳои 4-6-уми январ дар ноҳияҳои алоҳидаи ҷумҳурӣ фаромадани тормеғ ва бадшавии дурии биниш то 500 метр пешгӯӣ мешавад.

- Рӯзҳои 4 то 6-уми январ бо сабаби боришоти барф дар минтақаҳои кӯҳию доманакӯҳии вилояти Суғд, ноҳияҳои тобеи ҷумҳурӣ, шоҳроҳи нақлиётгарди Душанбе-Хуҷанд-Чаноқ (километрҳои 62-74-уми шоҳроҳ) ва ғарби ВМКБ сар задани зуҳуроти тарма пешгӯӣ мешавад,- меафзояд манбаъ.