Дар шаш моҳи соли равон 762,3 ҳазор сайёҳони хориҷӣ аз Тоҷикистон дидан намудаанд. Дар ин бора зимни нишасти хабарӣ дар Кумитаи рушди сайёҳии назди Ҳукумати Ҷумҳурии Тоҷикистон хабар доданд.

Тибқи иттилои масъулини ин ниҳод, шумораи сайёҳони хориҷӣ дар нимсолаи аввали соли 2025 нисбат ба ҳамин давраи соли гузашта 31,3 % афзуда, аз шумораи умумии шаҳрвандони хориҷӣ, ки 925,7 ҳазор нафарро ташкил медиҳанд, 850,6 ҳазор нафар ё 91,9 % ба мамолики ИДМ ва 75,1 ҳазор нафар ё 8,1 % ба мамолики хориҷи дур рост меояд.

Бо мақсади дар ҳолатҳои фавқулода сари вақт расонидани кумаки фаврӣ ба сайёҳони хориҷӣ кумита телефони бовариро бо рақами +992 118 200 200 фаъол гардонида, дар 30 ҳолат ба сайёҳони хориҷӣ кумаки фаврӣ расонида шудааст.