Сарраёсати Агентии Туркия оид ба ҳамкорӣ ва ҳамоҳангсозӣ (ТИКА) дар ҳамкорӣ бо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон дар Коллеҷи тиббии шаҳри Ҳисор озмоишгоҳи анатомӣ бунёд намуд. Маросими ифтитоҳи озмоишгоҳи дорои инфрасохтори муосири таълимӣ бо тантана баргузор гардид.
Муассисаи давлатии таълимии Коллеҷи тиббии шаҳри Ҳисор, ки соли 1986 таъсис ёфтааст, аз рӯи ихтисосҳои кори момодоягӣ, кори ҳамширагӣ, кори фармасевтӣ ва кори дандонсозӣ ба 2466 нафар донишҷӯён таълим дода истодааст. Дар доираи лоиҳаи амалинамудаи ТИКА як муҳити муосири озмоишгоҳӣ бунёд гардид, ки донишҷӯён онҷо метавонанд дарсҳои амалӣ гиранд.
Дар маросими ифтитоҳи лоиҳа муовини аввали вазири тандурустӣ ва ҳифзи иҷтимоии аҳолии Ҷумҳурии Тоҷикистон Муҳсинзода Ғафур, муовини раиси шаҳри Ҳисор Юлдошзода Бунафша ва Ҳамоҳангсози барномаҳои ТИКА дар Тоҷикистон Ибраҳим Этҳем Унал иштирок намуданд.
Дар маросими ифтитоҳи лоиҳа муовини аввали вазири тандурустӣ ва ҳифзи иҷтимоии аҳолии Ҷумҳурии Тоҷикистон Муҳсинзода Ғафур бо таваҷҷуҳ ба номуносиб будани инфрасохтори таълимӣ дар шаҳру навоҳии дурдасти кишвар изҳор дошт, ки омода кардани кормандони босифат барои соҳаи тандурустӣ, ки мустақиман ба ҳаёти инсон алоқаманд аст, танҳо тариқи гирифтани омӯзиши муносиби амалӣ имконпазир аст. Инчунин ӯ изҳор намуд, ки саҳми ТИКА дар беҳтар намудани инфрасохтори соҳаи тандурустии кишвар аҳамияти ҳаётӣ дорад ва аз ҳамкорӣ бо ТИКА изҳори қаноатмандӣ кард.
Ҳамоҳангсози барномаҳои ТИКА дар Тоҷикистон Унал изҳор дошт, ки озмоишгоҳи таъсиснамудаи ТИКА сифати таълимро боло мебарад ва ТИКА ҳамеша барои ҳамкорӣ ва амалӣ намудани лоиҳаҳо дар самти таҳкими инфрасохтори соҳаи тандурустии Тоҷикистон омода мебошад.
Ба туфайли озмоишгоҳи навтаъсис имконоти омӯзиши амалии донишҷӯёне, ки аз рӯи ихтисосҳои кори момодоягӣ, кори ҳамширагӣ ва кори дандонсозӣ таҳсил мекунанд, васеъ хоҳад гашт. Ҳамин тавр, баланд бардоштани имконияти дарёфти шуғл пас аз хатми таҳсил ва таъмини кадрҳои соҳибихтисос ба соҳаи тандурустии босуръат рушдёбандаи кишвар ба нақша гирифта шудааст.
