Салом сомонаи Oila.tj. Ман як зани дар нимароҳи зиндагӣ зору ҳайрон аз шумо маслиҳат пурсидан мехоҳам.
Сокини шаҳри Душанбе ва модари як фарзанд мебошам. Айни ҳол дар хонаи шавҳарам ҳастам, вале ростӣ зиндагии хубе надорам.
Шавҳарам бисёр ҷӯрабоз аст. Нисфи шаб ба хона меояд ва болои ин ҳама боз маро мезанаду дашном медиҳад. Болои сӯхта намакоб гуфтагӣ барин, хушдоман ва додаршӯям ҳар чизро баҳона карда, бо ман ҷанг мешаванд. Аввалҳо чандон аҳамият намедодам.
Сабр мекардам, вале дидам, ки торафт бадтар мешудаасту хубтар не. Чанд бор хостам ба хонаамон равам, аммо акааму очаам нахостанд, ки баргардам.
Рӯз ба рӯз саломатиам бад шуда истодааст. Асабҳоям монда, намедонам чи кор кунам. Дар ин ҷо истам, аниқ аст, ки рӯзе девона мешавам, агар ба хонаамон баргардам, ду янга дорам ва медонам, ки онҳо ба ман рӯи хуш намедиҳанд.
Ақаллан муносибати хушдоманам бо ман соз мебуд, тоқат мекардам, вале ӯ чунон гапҳои талхе мезанад, ки дили одам шикоф мешавад. Чанд бор маро бепою қадам номид, вале сарамро хам карда, хомӯш мондам. Модаршӯям ҳатто чизҳои хӯрданиро аз ман пинҳон мекунад.
Бовар кунед, ин зан чунон хислатҳои баде дорад, ки ногуфтанӣ. Ақаллан як хоначаи лойӣ медоштам, ки ҳамин писарчаамро ҷо мекардам, асло дар ин ҷаҳаннам намемондам, вале... Илтимос, ба ман маслиҳат диҳед, ки чӣ кор кунам?
М. Душанбе
