Занро фариштаи заминӣ ва олиҳаи покӣ мехонанд, вале мутаасифона бонувони бехирад ва беандешае ҳастанд, ки даст ба дуздию қаллобӣ ва дигар амалҳои ноҷо зада, ба номи неки зан-модар иснод меоранд. Вазорати умури дохилии кишвар аз боздошти як ҷавондухтари 19-сола бо иттиҳоми дуздӣ хабар додааст.
Тавре ки манбаъ мегӯяд, ба ШВКД дар ноҳия Ҷаббор Расулов бо ариза як зани 57-солаи сокини ноҳияи мазкур муроҷиат намуда, шикоят аз он кардааст, ки санаи 24-уми апрел, тахминан соатҳои 06:00-и субҳ шахси номаълум бо роҳи пинҳонӣ ба хонаи истиқоматиаш даромада, аз манзилаш 4 ҳазор сомонӣ ва 1-адад гарданбанди тиллоиро дуздида, аз ҷойи ҳодиса ғайб задааст.
Дар пайи шикояти зан дар рафти чорабиниҳои оперативӣ-ҷустуҷӯӣ аз ҷониби кормандони мақомоти милитсия як духтари 19-солаи сокини ноҳияи Спитамен ҳамчун гумонбар дар содир намудани ҷинояти дуздӣ дастгир шуда, оид ба ин ҳодиса парвандаи ҷиноятӣ бо моддаи 244, қисми 2 Кодекси ҷиноятии Ҷумҳурии Тоҷикистон оғоз карда шудаааст. Тафтишоти ин қазия аз ҷониби мақомот идома дорад.