Боздошти як гурӯҳ ноболиғони

кордбадаст дар кӯчаи Айнии Душанбе

Раёсати корҳои дохилӣ дар шаҳри Душанбе аз боздошти як гурӯҳ ноболиғон хабар додааст, ки  бо корд ва дигар ашёҳои халандаю бурранда мусаллаҳ гашта, бо ҳам муноқиша кардан мехостаанд.

Тибқи иттилоъи манбаъ, шаби 19-уми январ як гурӯҳ ноболиғони бо корд ва дигар ашёҳои халандаю бурранда мусаллаҳгашта  дар кӯчаи С.Айнӣ ҷамъ шудаанд ва мехостанд бо ҳамдигар муноқиша кунанд, вале кормандони милитсия ҳодисаро сари вақт пешгирӣ намуда, дар ҷойи воқеъа 6 ноболиғро дастгир кардаанд.
“Зимни кофтуков аз онҳо ду адад кордҳои гуногунтамға дарёфт ва мусодира карда шуд”, - омадааст дар хабар.
Алайҳи волидайни ноболиғони дастгиршуда барои иҷро накардани уҳдадорӣ оид ба таълиму тарбияи кӯдак тибқи моддаи 90 КҲМ парвандаи маъмурӣ оғоз карда шудааст. Ин банди қонун ҷарима ба маблағи 780 сомонӣ ё ҳабс ба муҳлати то 10 шабонарӯз пешбинӣ менамояд.