Раванди табиист, ки одамони фаъол дар фазои маҷозӣ зуд ва хеле зиёд маъруф мешаванд, зеро рӯз аз рӯз интернет барои мардум дастрастар мегардаду корбаронаш меафзоянд. Дар сегменти тоҷикии интернет, ки хеле кӯчак аст, дар чанд соли охир нафарони зиёд машҳур шуда, худро маҳз дар натиҷаи пешбурди шабакаҳои иҷтимоӣ сохтанд. Яке аз чунин касон Беҳрӯз Шарифӣ мебошад, ки миёни мардум бо тахаллуси Барон шинохта шудааст.
Метавон гуфт, ки дар ҳоли ҳозир Барон яке аз фаъолтарин ва пешсафтарин блогерони тоҷик ба шумор меравад. Дар Инстаграм зиёда аз як миллиону 400 ҳазор ва дар Ютуб наздики 700 ҳазор обуначӣ дорад. Дар кишвари мо ин миқдор аудитория доштан муваффақияти калон аст.
Барон фаъолияти рэпсароӣ ва блогериашро бисёр хуб ба роҳ мондааст. Ӯ ҳоло рэп мехонад, консертҳо барпо мекунад. Рэпҳояш сершунаванда буда, дар шабакаҳои иҷтимоӣ миллионҳо нафар ба онҳо таваҷҷуҳ доранд. Ҳамчунин, подкасте бо номи "Ту чӣ фикр дорӣ"-ро бо чеҳраҳои шинохтаи фазои маҷозӣ таҳия менамояд.
Хуллас, Баронро ҳоло аксари мардуми мо мешиносанд ва ӯ аз ин фурсате, ки дорад, бисёр хуб истифода мекунад.
Аммо ҳамагӣ чанд сол пеш равияи эҷодии ӯ тамоман дигар буд. Бояд ёдовар шавем, ки дар рэп ду равияи асосӣ аст: рэпи сиёҳ ва ошиқӣ. Барон дар аввали корномаи рэпсароияш ҳамчун рэпсарое, ки рэпҳои сиёҳ ва кӯчагӣ мехонад, миёни доираи маҳдуд шинохта буд. Ӯ рэпҳое, мехонд, ки танҳо барои бачаҳо, махсусан ҷавонони кӯча буданд.
Албатта, бисёриҳо ба фикре ҳастанд, ки Баронро сароянда ва блогери тоҷик Абдурозиқ Эгамов машҳур кард. Ин то ҷое дуруст аст, вале набояд фаромӯш кард, ки Барон пеш аз ҳамкорӣ бо Абдурозиқ аллакай рэпсарои шинохта буд ва ҳатто ҳамчун блогер саҳифаи "Avlod media"-ро пеш мебурд. Барон маҳз бо рэпҳои сиёҳаш миёни ҳаводорони рэп шинохта гардида буд, аммо дар натиҷаи ҳамкорӣ бо Абдурозиқ Эгамов аллакай ба сатҳи дигар расид. Яъне, ӯ тавонист дар баробари рэпсароӣ худро ҳамчун продюсер ва блогер ба доираи васеи корбарони интернет муаррифӣ кунад.
Метавон гуфт, ки нақши Абдурозиқ дар корномаи Барон зиёд аст, аммо ӯ маҳз бо рэп машҳур шуд ва ҳоло хеле муваффақ аст.
