Вазири маориф ва илми Тоҷикистон Раҳим Саидзода зимни сафараш ба ноҳияи Ҳамадонии вилояти Хатлон гуфтааст, ки ба ҷамъ кардани маблағ барои обуна ба рӯзномаю маҷаллаҳои ғайрисоҳавӣ ва таъмири мактабҳо бояд хотима гузошта шавад.

Тавре Вазорати маориф ва илми кишвар иттилоъ додааст, вазири маориф Раҳим Саидзода рӯзи 7-уми июн аз мактаби №14-и ноҳияи Мир Сайид Алии Ҳамадонӣ боздид ба амал оварда, бо омӯзгорони ин муассисаи таълимӣ суҳбат намудааст. Зимни суҳбат вазир ба масъалаи баланд бардоштани сатҳу сифати таълим ва ҷалб накардани омӯзгорон ба обуна ба нашрияҳои ғайрисоҳавӣ сухан ронда, ба ҷамъ накардани маблағ барои таъмиру дигар эҳтиёҷоти муассиса таъкид кардааст.

Ҳарчанд масъулини соҳаи маориф таъкид мекунанд, ки ҷамъоварии  маблағ барои таъмиру гармикунонии мактабу кӯдакистонҳо манъ аст, вале новобаста ба ин ҳамасола дар охири соли хониш ин масъала боз ба миён омада, баҳсу мунозираҳои зиёдеро ба вуҷуд меорад.