Рӯзҳои 11-13 июли соли 2023 Ассотсиатсияи “Ҳамкории боздошти сил дар Тоҷиистон” (ҲБСТ) дар ҳамдастӣ бо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Муассисаи давлатии “Маркази ҷумҳуриявии ҳимояи аҳолӣ аз бемории сил” (МҶҲАБС) дар доираи лоиҳаи USAID оиди бартараф намудани бемории сил дар Тоҷикистон омӯзиши серӯзаро барои намояндагони ташкилоти ҷамъиятӣ аз гӯшаву канори кишвар баргузор намуд.

Омӯзиш бо сухани ифтитоҳии Сафаралӣ Наимов, диретори иҷроияи ҲБСТ, Рустам Нуров, директори МҶҲАБС ва паёмҳои зиддисиливу шӯхиҳои намакини ҳаҷвнигори маъруфу маҳбуб, сафири пешгирии сил Ҷамшеди Ҳалим оғоз гардид.

Дар омӯзиш масъалаҳои зерин баррасӣ гардид:
 беҳтар кардани дарёфти бемории сил ҷиҳати расидан ба ҳадафҳои Барномаи миллии ҳимояи аҳолӣ аз бемории сил дар Ҷумҳурии Тоҷикистон барои солҳои 2021-2025;
 истифодаи дастгоҳи рентгени сайёр бо зеҳни сунъӣ;
 тақвияти корҳои ташкилӣ, ҳамоҳангсозӣ, ҳамкорӣ ва баланд бардоштани иқтидор дар самти дарёфти ҳама гуна шаклҳои бемории сил;
 фаъолияти якҷояи ташкилотҳои ҷамъиятӣ ва марказҳои зиддисилӣ дар самти пайгирии самараноки алоқамандони беморони сил;
 муҳиммияти дастгирии руҳӣ-эҳсосии шахсони аз сил осебдида барои беҳтар намудани риояи табобат.
Мутахассисони варзидаи соҳаи силшиносӣ ба намояндагони ташкилоти ҷамъиятӣ нозукиҳои пайгирӣ, дарёфту табобат, истифодаи дастгоҳи рентгении сайёр бо зеҳни сунъӣ ва дастгирии руҳӣ-эҳсосии шахсони аз сил осебдидаро омӯзониданд.

Мақсад аз баргузории ин омӯзиш баланд бардоштани иқтидори ташкилотҳои ҷамъиятӣ дар самти пайгирии алоқамандон, дарёфти саривақтии ҳамаи шаклҳои бемории сил, истифодаи дастгоҳҳои замонавии рентгенӣ бо зеҳни сунъӣ ва дастгирии руҳӣ-эҳсосии шахсониаз сил осебдида барои баланд бардоштани риояи бабобат буд.

Интизор меравад, ки иштирокчиёни ин омӯзишҳо донишу малакаи ба дастомадаро барои баланд бардоштани самаранокии муборизаҳои зиддисилӣ истифода намоянд.
Дар анҷоми омӯзиш ба иштирокчиёни омӯзиш гувоҳиномаҳо тақдим гардиданд.

Ин фаъолият тавассути дастгирии Агентии ИМА оид ба рушди байналмилалӣ имконпазир шудааст. Мазмун ва мундариҷаи ин мавод маҳсули эҷоди ‘Ҳамкории боздошти сил дар Тоҷикистон’ буда, метавонад бо нуқтаи назари Агентии ИМА оид ба рушди байналмилалӣ мувофиқат накунад.