Шахсоне, ки хот-дог мехӯранд ё ҳамсарашонро талоқ медиҳанд, ба ҷавобгарӣ кашида мешаванд. Чунин одамонро ба корҳои маҷбурӣ ҷалб намуда, ба лагерҳои меҳнатӣ мефиристанд.
Дар Куриёи Шимолӣ хӯрдани хот-дог ва талоқ додани занро қонунан манъ намуданд. Пешвои ин кишвар Ким Чен қоидаҳои навро ҷорӣ намудааст, ки мувофиқи он минбаъд дар Куриёи Шимолӣ тайёр кардан, фурӯхтан ва хӯрдани хот-дог қатъиян манъ мебошад. Дар ин бора Daily Mail хабар додааст.
Фурӯхтан ва хӯрдани хот-догро бо сабаби ғизои аврупоӣ буданаш манъ намудаанд. Шахсоне, ки ҳангоми тайёр кардан, хариду фурӯш ё хӯрдани хот-дог ба чанг меафтанд, ба ҷавобгарӣ кашида шуда, маҷбуран ба лагерҳои меҳнатӣ фиристода мешаванд.
Дар Куриёи Шимолӣ талоқ низ қатъиян манъ карда шудааст ва шахсоне, ки оилаи худро вайрон месозанд, ба ҷавобгарӣ кашида мешаванд. Зану шавҳароне, ки барои ҷудо кардани ақди никоҳашон муроҷиат менамоянд, ба лагеҳои меҳнатӣ фиристода мешаванд.
