Дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вохӯрии вазири тандурустӣ ва ҳифзи иҷтимоии аҳолӣ Ҷамолиддин Абдуллозода бо гурӯҳҳои кории вазорат, ки барои расонидани кумаки дастурию методӣ дар самти пешгирии фавти модару кудак ба шаҳру ноҳияҳои мамлакат сафарбар мегарданд, баргузор гардид.
Бино ба иттилои дафтари матбуоти вазорат, дар вохӯрӣ муовини вазир Зулфия Абдусаматзода, сардорони раёсату шуъбаҳои дахлдори дастгоҳи марказии вазорат иштирок намуданд.
Тавре зикр гардидааст, ҳадаф аз таъсис додан ва сафарбар намудани гурӯҳҳои корӣ иборат аз мутахассисони соҳибтаҷрибаи марказҳои саломатӣ, солимии репродуктивӣ, таваллудхонаҳо ва дигар муассисаҳои тиббию табобатӣ - ин пеш аз ҳама расонидани кумакҳои дастурию методӣ ба мутахассисони муассисаҳои тандурустии шаҳру ноҳияҳои мамлакат ва бо ин роҳ пешгирии фавти модару кӯдак ба шумор меравад.
- Ҳамзамон, дар ҷаласа вазъи кунунии хизматрасонии тиббӣ ба модарон ва кӯдакон дар муассисаҳои тандурустӣ таҳлил ва баррасӣ гардида, таъкид карда шуд, ки айни замон масъалаҳои хизматрасонии тиббӣ ба модарон ва кӯдакон дар маркази таваҷҷуҳи давлат ва Ҳукумати мамлакат қарор дорад,- меафзояд манбаъ.
