Директори Агентии давлатии ҳифзи иҷтимоии аҳолӣ Абдулло Сафарзода аз муассисаҳои давлатии Хона-интернат барои маъюбони бемориҳои рӯҳии шаҳри Ҳисор ва Хона-интернати пиронсолону маюбони шаҳри Турсунзода дидан намуда, бо вазъи фаъолияти муассисаҳои мазкур дар давраи тирамоҳу зимистон шинос гардидааст.

Бино ба иттилои дафтари матбуоти Вазорати тандурустӣ ва ҳифзи иҷтимоии аҳолии кишвар, сараввал дар муассисаҳои номбурда Абдулло Сафарзода бо вазъи будубоши бошандагон шинос шуда, бо онҳо суҳбатҳо гузаронидааст. Хусусан ба масъалаи таъмини гармидиҳӣ дар ҳуҷраҳои хоби бошандагон, ҳолати риояи қоидаҳои санитарию гигиенӣ, нигоҳубини тиббию иҷтимоии бошандагони барҷомонда ва таъминоти ғизо аҳамияти аввалиндараҷа дода шудааст.

- Сипас, Сафарзода Абдулло аз анборҳои захираи маводи хӯрок, захираи маҳсулоти кишоварзӣ барои давраи тирамоҳу зимистон, захираи ангишт, ҳезум ва маводи сӯхт, коршоямии генераторҳои барқӣ дар ин давра ва ошхонаи муассисаҳо дидан намуда, омодагии нақшавии онҳоро аз назар гузаронид,- меафзояд манбаъ.