Барои як клиптарона омода кардан, ки миллионҳо тамошобин дошта бошад, заҳматҳои зиёд бояд ба харҷ дод. Имрӯз мо ба шумо дар бораи 5 таронаи беҳтарини ситораҳои тоҷик, ки дар соли 2024 ба мардум пешкаш шуда, шумораи зиёди тамошобинон ин сурудҳоро тамошо кардаанд ва баҳои баланд доданд, маълумот медиҳем.
Дар ҷойи 5-ум Фараҳноз Шарафова бо суруди “Ҳабибӣ” қарор дорад. Ин клиптарона дар ютуб-канали худи Фараҳноз пешниҳод гардида, аз рӯзи нашраш то ба имрӯз онро 7,3 миллион нафар дидан намудаанд. Матни суруд аз Бахтиёр Раҳмониён буда, оҳанг моли Шавқат Умаров аст.
Дар ҷойи 4-ум таронаи бонуи ҳунар Ёсамин Давлатова бо номи “Бачаи Қурғанӣ” қарор дорад. Ин тарона 6 моҳ қабл дар ютуб-канали Ёсамин пешкаши ҳаводорони савту наво гашт. Таронаро аз рӯзи нашраш то ба имрӯз зиёда аз 11 миллион нафар тамошо кардаанд.
Дар зинаи 3-юми ҷадвал сарояндаи саршинос Мадина Ақназарова бо суруди “Мастам аз нигоҳат” ҷойгир шудааст. Ин тарона 6 моҳ қабл дар ютуб-канали худи Мадинабону ба ҳаводоронаш пешкаш гардид. Клиптаронаи мазкурро дар 6 моҳ зиёда аз 13 миллион нафар тамошо кардаанд. Матни суруд аз Ақназар Аловатов буда, оҳанг аз Хушбахт Ниёзов мебошад.
Дар зинаи 2-юми беҳтарин сурудҳои соли 2024 сарояндаи маҳбуби дилҳо Зулайхо Маҳмадшоева ва репсарои машҳур Барон бо суруди “Baby” қарор доранд. Ин суруд 7 моҳ қабл дар ютуб-канали Зулайхо Маҳмадшоева пешкаши ҳаводорони савту наво гашта буд. Клиптаронаро дар муддати 7 моҳ зиёда аз 16 миллион нафар дидан намуда, ба суруд баҳои баланд додаанд. Матни суруд аз Орзу Исоев ва Беҳрӯзи Шарифӣ (Барон) буда, оҳанг аз Роберт Мирзоян мебошад.
Дар ҷойи 1-ум ситораи тобноки эстрадаи тоҷик Шабнами Сурайё ва сарояндаи шинохтаи Ӯзбекистон Шавқат Умаров бо суруди “Гиждалла” қарор доранд. Ин тарона 6 моҳ қабл дар ютуб-канали Шабнами Сурайё пешкаши ҳаворони мусиқӣ гашта, то ба имрӯз онро 25 миллион нафар дидан намудаанд. Ин клиптарона зимни консерти бонуи ҳунар Шабнами Сурайё дар шаҳри Хуҷанд сабт гардидааст.
