Лоиқ Холов сарояндаи ҷавонест, ки имрӯз дар роҳи санъат устуворона гом мениҳад. Ӯ фарзанди Ҳунарманди халқии Тоҷикистон Давлатманд Холов аст, ки идома медиҳад пешаи падарро. Сурудҳояш чандест аз ҷониби мардум гарм истиқбол мешаваду дӯстдорони садояш меафзояд. Ба ҳамин хотир рафтем суроғаш ва суҳбате анҷом додем оиди оғози фаъолияту идомаи эҷодаш.
- Лоиқ номгузорӣ шудани шумо пайвандие бо устод Лоиқ Шералӣ дорад?
- Падарам бо устод Лоиқ дӯстӣ доштанд ва номи маро худи устод гузоштаанд.
- Чанде пеш аз Корея баргаштед. Сафари ҳунарӣ доштед ба ин кишвар?
- Бале. Онҷо фестивале доир гардид ва мо як зумра ҳунармандони тоҷик низ дар он иштирок кардем. Чорабинӣ бисёр хуб баргузор шуд.
- Кӯдакии шумо дар омезиш бо суруду мусиқӣ сипарӣ шуда. Аммо аввалин ҳунарнамоӣ дар рӯи саҳна кай буд?
- 7-сола будам, ки аллакай сози думбра менавохтам. Дар хонаи мо қариб 15 навъи асбоби мусиқӣ ҳаст, ки аз ӯҳдаи навохтани ҳамаи онҳо мебароям. Баъдан, аз 9-10-солагӣ ба овозхонӣ шуруъ кардам. Аз соли 2021 бо пешниҳоди суруди “Роҳдур модарам” шинохта шудам. Пеш аз ин суруд баромадҳо доштам. Аммо он замон бештар дар паҳлӯи устодам – падари азизам ҳамчун навозанда ё овозхони дуюм будам. Тақрибан 20 сол аст, ки дар назди падарам шогирдӣ мекунам. Сипос, бо дуои ӯ дар рӯи саҳнаҳои калон сурудхонӣ карданро оғоз кардам.
- Яъне, вақте иҷозаи устодро гирифтед, баъдан мустақилона ҳунарнамоиро шуруъ кардед?
- Бале. Вақте аз имтиҳони санъаташ гузаштам, баъдан ба ман дуо доданд, ки ба роҳи худам равам.
- Аз падар барои шумо фарзандаш дар ҷараёни омӯзиш гузаштҳо намешуд?
- Падарам хеле устоди сахтгиранд. То ҳол ба ман нагуфтаанд, ки ин ё он ҷойи овозатро ин гуна кун ё ин хел суруд саро. Танҳо гуфтаанд, ки ту дар паҳлӯи ман бошу маро гӯш кун. Аз ҳамин бодиққат гӯш карданҳо худам иштибоҳоти худро дарк мекардам ва пайи ислоҳаш мешудам. Қиблагоҳам маро он гуна санъатро омӯзониданд, ки худам аз чӣ хел ёд гирифтани он бедарак мондам
- Баъди гирифтани дуои падар ва мустақилона ҳунарнамоӣ карданҳо сурудҳои баъдиро ба танҳоӣ омода кардед ё бо машварати падарам.
- Ҳар суруде, ки то имрӯз пешниҳоди мардум гаштааст, ҳатман аз назари падарам гузаштаанд. Мо бо бародарам Дониёр якҷоя маслиҳат карда, сурудро омода мекунему онро ба падар нишон медиҳем. Устод, ки қабул карданд, баъдан аз пайи сабту пешниҳод кардани он ба мухлисон мешавем.
- Ғайр аз шумою Дониёр боз киҳо идомадиҳандаи роҳи ҳунаранд?
- Дониёр найнавози моҳир ва оҳангсози хуб аст. Аз ҷумла, суруди “Ҳаво, ки шар-шар мекунад” оҳанги Дониёр аст. Ӯ дар бари ман ҳамчун мутриб ва оҳангсоз хизмат мекунад. Ҳамчунин, бародаронам Рӯзимад рубобнавози моҳир аст, Сангимад таблак менавозад, Хуршед ғижакнавозӣ мекунад. Ҳамин гуна қариб ҳама фарзандон дар паҳлӯи падар кор мекунем.
- Суруди “Раҳдур модарам”, ки шуморо бо мардум бештар шиносонд, хеле маҳбуб гардид. Онро дар шабакаи ҷаҳонии Ютуб то ин вақт зиёда аз 2 миллион нафар тамошо кардаанд. Ин суруди падар бо пешниҳоди кӣ аз ҷониби шумо бозхонӣ шуд?
- Бале, суруди “Раҳдур модарам” аз эҷодиёти падарам аст. Ин суруд-ро дар як ҷамъомаде сароидам ва як дӯсти қадрдон ба ман гуфт, ки хуб иҷро кардам ва маслиҳат дод, ки ҳамин сурудро сабт карда, ба мардум пешниҳод кунам. Сурудро омода карда, аз назари падар гузаронидем. Падар ҳам хуб қабул карданд ва ҳамин тавр онро ба мардум пешниҳод кардем.
- Тамошобинони суруди баъдӣ - “Борон агар биборад” ҳам аз ду миллион нафар зиёданд...
- Ин суруд оҳанг ва такмили устод Содиқ Холов аст. Эшонро зиёд эҳтиром дорам ва ҳунарашонро дӯст медораму қадр мекунам. Ин сурудро ҳам аввал дар назди дӯстон сароидам. Онҳо хуш пазируфтанд ва онро ҳам сабт карда, ба мардум пешниҳод кардем, ки хушбахтона шунавандаи худро пайдо кард.
- Чандест, ки суруди “Ҳаво, ки шар-шар мекунад” садо медиҳад дар ҳама ҷо вирди забонҳост. Ин суруд бо як сабки хосу ҷолиб суруда шудааст. Чӣ таърихеро соҳиб аст офаридани он?
- Ин суруд тақрибан ҳашт моҳ пеш сабт шуда буд. Баъди омода шудан, ба якчанд дӯстону рафиқон фиристода будем. Баъди он суруд паҳн шуд ва ҳар касе онро дар Ютуб бо як акси ман мегузоштанд. Хостем худамон бо ин суруд як видеоклип омода кунему баъдан онро пешниҳоди мардум намоем. Ҳамин тавр, бо гурӯҳи “Панҷшер медиа” маслиҳат карда, аз пайи кор шудем. Аммо моҳи рамазон буду сабти клип дертар анҷом ёфт. Дар ин миён ба хотири ҷалб кардани диққати тамошобинон суруди “Лайло”-ро бо як акс дар ютуб нашр кардем. Баъдан, видеоклип омода шуду онро пешниҳоди мухлисон сохтем ва хушбахтона хуб пазироӣ гардид.
- Видеоклип дар куҷо сабт гардид?
- Мо наворбардориро аз кӯҳҳои ноҳияи Айнӣ шурӯъ кардем. Ба мо дар рафти наворбардорӣ борони табиӣ лозим буд. Мо шаб то субҳ интизори боридани борон шудем, аммо интизориҳоямон бенатиҷа шуд. Баъдан, ба хонаҳо баргаштем, ки боридани борон шурӯъ шуд. Мо дубора бархостем ва рафтем ба наворбардорӣ.
- Вақте ҳар сурудатон ин ҳама гарм истиқбол мешавад, чӣ эҳсос бештар фарогиратон мешавад: ифтихор, шукргузорӣ ва ё хушҳолии беҳад?
- Ҳам шукргузорӣ, ҳам хушҳолӣ ва ҳам ҳаяҷону ифтихор. Ҳар ҳунарманд барои омода шудани як суруд заҳмати шабонарӯзӣ мекашад ва ягона ҳадафи ӯ ҳамин аст, ки суруд хуб қабул шавад. Вақте ҳамин гуна суруд ба ҳадафи худ мерасад, воқеан хушҳолибахш ва ифтихорангез аст.
- Садою тарзи сароидани шумо шабеҳ аст ба садои устод Давлатманд Холов. Ин бо хости худи падар буд ё таъсири омӯзиши ҳунари эшон?
- Падар ҳеҷ гоҳе нагуфтаанд, ки ба ман тақлид кун. Фақат таъкид кардаанд, ки омӯзам. Боре падарам гуфтанд, ки аз кӯдакӣ ман садоямро дар садои ту дида будаму медонистам, ки рӯзе идомадиҳандаи роҳи ҳунарии ман мешавӣ. Ба ҳамин хотир, садои ман ба садои падарам монанд аст, аммо устод ҷойи худро доранду ҳеҷ касе он ҷойро гирифта наметавонад. Ман танҳо пайрави падарам – устоди азизам ҳастам.
- Падар имрӯз аз фаъолияти шумо эҳсоси қаноатмандӣ мекунанд?
- Фаъолиятамро хуб баҳогузорӣ мекунанд, хушҳол ҳам ҳастанд. Аммо то ҳол ба ман нагуфтаанд, ки офарин ба ту писарам. Барои аз устод аҳсану офарин шунидан, ҳоло заҳматҳои зиёдро кашидан лозим. Дар хонаи мо асбобҳои мусиқӣ хеле зиёданд. Баъзан падарам бо ҳамон асбобҳояшон дар танҳоӣ суҳбат мекунанд. Як рӯз ҳамин гуна ҳарф мезадаанд, ки модарам шунидаанд. Падарам ба асбобҳояшон гуфтаанд, ки ман хурсандам, ки шумо боз як соҳиби дигар пайдо кардед. Падарам маро дар назар доштаанд.
- Қарор аст бо ин сабк биравед то поёни роҳ ё тағйироти замону ҷомеа метавонад онро дигар бикунад?
- Сабки ман аз падари азизам аст ва аз хурдӣ онро омӯхтааму бо он ба камол расидаам ва ҳамин гуна идома хоҳам дод. Танҳо дар ин сабк вобаста ба талаботи шунавандаи имрӯза каме тағйирот илова кардаам.
- Ба фикратон ҷавонии шумо чӣ қадар самаранок пушти сар шуда истодааст?
- Дар муддати зиёда аз ду сол чандин касон кору фаъолиятамро баҳогузории хуб карданд. Ин шояд аз ин сабаб аст, ки пайваста аз пайи корҳои эҷодӣ ҳастам. Ман имрӯз аз баҳри зиёде аз чизҳо барои эҷодам гузаштаам ва аз ҷавонии худам розиям.
- Ҳаст чизе, ки имрӯз нарасад ба ҷавони тоҷик?
- Не. Имрӯз мо ҷавонони тоҷик таъминем бо ҳама шароиту имконот. Албатта, бо талошҳои Пешвои миллат ва бо фазои амну осоишта дош-тани Тоҷикистони азиз. Танҳо моро мебояд бо як ифтихор ва дилгармӣ пайи кору фаъолияти худ бошем.
- Мухлисони Лоиқ имрӯзҳо интизори суруди ҷадиде буда метавонанд?
- Албатта. Сурудҳои зиёд омода шуда истодаанд ва ба зудиҳо пешкаши мухлисон мешаванд. Хусусан, як суруди ҷадид дар ҳоли омода шуданҳо қарор дорад, ки чунин мисраҳо дорад:
Ёфт дар даврони Ваҳдат санъатам нашъу намо,
Рафт дар олам садою эътибори санъатам.
Аз идора: Ба наздикӣ Лоиқ Холов меҳмони барномаи "Паси саҳна" хоҳад шуд. Суҳбати моро дар ютуби "Оила" интизор бошед.
