Сарояндаи машҳури тоҷик Нодирабегим Усарзода бо садои форами андалебосояш маҳбуби дӯстдорони савту навои тоҷику ӯзбек гардидааст. Ин санъаткори хушовоз пайваста бо забони тоҷикиву ӯзбекӣ суруд мехонад ва дар ҳар ду кишвари ҳамҷавор аудиторияи хос дорад. Нодирабегим соле қабл аз эҷодиёти устодони санъати тоҷику ӯзбек гулчини таронаҳоеро бозхонӣ кард, ки аз ҷониби мухлисон хуш пазируфта шуд. То ҳол ин таронаро дар шабакаи ютуб 1813205 миллион нафар тамошо кардаанд.
Нодирабегим Усарзода дар мусоҳиба бо хабарнигори Oila.tj аз ҳаёту фаъолият, корҳои эҷодӣ ва хушбахтии оилавияш қисса кард.
- Шумо дар оилаи оҳангнавози маъруф Усарҷон Остонов ва Ҳунарпешаи шоистаи Тоҷикистон, Тоҷинисо Ниёзова ба камол расидаед. Мегуфтед, ки муҳити хонавода боис гашт, ки овозхон шавед ё сароянда шудан орзуятон буд?
- Албатта ояндаи кӯдак аз муҳити хонавода вобастагии зиёд дорад. Чун падарам Усарҷон Остонов оҳангнавоз буданду ба ҳама навъи асбоби мусиқӣ дастрасӣ доштанд, аз хурдӣ ба олами санъат ошно будем. Лекин орзу надоштам ва дар ягон гушаи хаёлам ҳам набуд, ки пешаи сарояндагиро интихоб мекунам. Синфи 7 будам, ки бибиям тарзи хондани таронаеро омӯзонданд. Ҳамон сурудро дар як чорабинии мактаб хондам. Баъдан, пайваста дар озмуну чорабиниҳо хоҳиш мекарданд, ки суруд хонам. Ҳамин тавр ба олами бузурги санъат ворид шудам. Мана, солҳост ки дар ин ҷода заҳмат мекашам. Аз пешаи худ ифтихор дорам ва шод аз онам ки ба халқи азизам суруру шодмонӣ мебахшам.
- Аз фарзандон танҳо Шумо овозхон шудед ва умуман киҳо домони пешаи волидонро гирифтанд?
- Мо 5 духтар то оиладор шудан дар чорабиниҳои сатҳи вилояту ҷумҳурӣ иштирок мекардем. Дар саҳнаҳои калон суруд мехондем. Ҳатто гурӯҳе бо номи "Тоҷ" таъсис дода будем. Бо як завқи баланд ва муҳаббати беандоза ба санъат, тарона мехондем. Ҳоло дар оила танҳо ман санъаткорам ва онҳо баъди оиладор шудан аз санъат дур шуданд. Албатта ин хоҳиши худашон буд.
- Биёед каме аз достони ишқи худ қисса кунед. Чӣ тавр бо Элдорбек Файзиев ошноӣ пайдо кардед?
- Мо ҳамроҳи Элдорбек Файзиев дар донишгоҳ дар як курс таҳсил мекардем. Он кас дониши хуб доштанд. Ҳатто баъзан дар дарсҳо аз рӯйи баҳогирӣ рақобати солим доштем. Бисёр ҷавони батамкин ва хушахлоқу хушмуомила буданд. Муносибатҳои мо танҳо дӯстона буд. Баъдан Элдорбек таклифи оиладорӣ карда, хостгор фиристоданд. Ҳамин тавр оила барпо кардем. Ҳоло 17 сол мешавад, ки зиндагии хушбахтона дорем ва соҳиби ду фарзанди дӯстрӯякем.
- Дар якҷоягӣ бо Элдорбек Файзиев якчанд дуэт хондаед, ин пешниҳоди Шумо буд?
- Бале хондани дуэт бо Элдорбек Файзиев пешниҳоди ман буд. Ман худ мухлиси Элдорбек ҳастам. Он кас ниҳоят овози фораму зебо доранд. Мо таронаи "Лайлию Маҷнун"-и Тоҷиддин Муҳиддинов ва Муқаддас Набиеваро бозхонӣ кардем, ки аз ҷониби мухлисон хуш пазируфта шуд. Ин таронаро дар шабакаҳои мусиқии Эрон низ борҳо пахш карданд. Ғайр аз ин боз се чор дуэти дигар ҳам дорем.
- Ба корҳои эҷодӣ хоса офаридани тарона шавҳаратон ба Шумо кӯмак мерасонанд?
- Албатта ба корҳои эҷодӣ Элдорбек кӯмак мекунанд. Ҳар як таронае, ки мехонам яккум аз назари шавҳарам мегузарад ва охирин хулосаро ҳам он кас медиҳанд. Аввалин шунавандаи таронаҳоям низ шавҳарам мебошанд. Бештари вақт сенарияи клиптаронаҳоро ҳам дар якҷоягӣ бо Элдорбек эҷод мекунем.
- Таронаи "хушдоманҷон" - ро ба хушдомани худатон бахшидаед?
- Ростӣ хондани чунин тарона дер боз дар нақшаам буд. Доимо дар фикри эҷоди ҳамин суруд будам. Мехостам ба хушдомани азизам, ки бароям чун модар шудаанд сурудеро бахшам. Хушдоманамро бениҳоят дӯст медорам. Он кас зани меҳрубон, фарҳангдӯст ва қавиирода мебошанд. Дар зиндагӣ ба ду зан монанд шудан мехоҳам, яке модар ва дигаре хушдоманам. Кӯшиш кардем дар суруди "хушдоман" изҳори сипосу миннатдории тамоми келинҳоро ба хушдоманҳои азиз иброз дорем. Сенарияи намоҳанги мазкурро бо дар якҷоягӣ бо Темурҷон Султонӣ омода кардем.
- Барои як зан, ки эҷодкор аст ҳам рӯзгордорӣ ва ҳам нигоҳубини хонаву дару фарзандон душвор нест?
- Аз иҷрои корҳои хона рӯбучин, пухту паз нерӯ мегирам. Вақте фарзандор шудем, қариб 10 сол дар деҳа ҳамроҳи хусуру хушдоманам зиндагӣ кардем. Келини калонӣ, ки будам чун келинҳои дигар ҳамарӯза ба кору бори хона машғул мешудам. Рӯймол баста нон мепухтам, хӯроку хӯришҳои миллӣ тайёр мекардам. Тамоми таваҷҷӯҳу эътибори ҳам хешу табор ва ҳам ҳамсояҳо ба ман буд. "Келнини шаҳрӣ омад, келини санъаткор омад" - гуфта бо ҳавас менигаристанд. Кӯшиш мекардам келини намунавӣ бошам. То ҳол ба деҳа рафта меистем ва чун ҳарвақта вазифаҳои келинии худро иҷро мекунам.
- Нодирабегим пухтани кадом хӯрокҳои миллиро дӯст медоранд?
- Аз уҳдаи пухтани ҳамаи навъҳои хӯроки миллӣ хуб мебароям. Вале бештар пухтани оши палавро дӯст медорам. Хусурам низ палави пухтаамро таъриф мекунанд. Ҳар бор, ки рафтам хоҳиш мекунанд барояшон палав омода кунам.
- То чӣ андоза метавонад клиптаронаи як ҳунарманд ба афкори ҷомеа таъсир расонад?
- Воқеан намоҳанги ҳар як тарона ба афкори ҷомеа бетаъсир намемонад. Аз ин рӯ кӯшиш мекунем, барои сурудҳоям намоҳанги тарбиявӣ ахлоқӣ ба навор гирем. Вақте як нафар дар клиптарона симои модар, лаҳзаи фироқ, навозиши ҳамдигар, меҳрубонӣ муҳаббат ва амсоли ҳамин чизҳоро мебинад бемуҳобо ба ӯ таъсир мекунад. Масалан, ба модараш занг мезанад, ба ҳамсараш изҳори сипос мекунад ё аз бахти баланди доштаи худ шукрона мекунад.
- Ин қадар оилаи намунавиеду ду ҷуфти муносиб. Оё дар ягон озмунҳои оиладорӣ иштирок кардаед?
- Мо қариб ҳар сол дар озмуни "Оилаи беҳтарин" иштирок мекунем. Баъзан ҳамчун иштирокчӣ ва баъзан ҳамчун санъаткор. Якчанд маротиба ғолиб ҳам баромадем ва аз дасти раиси шаҳру вилоят туҳфа гирифтаем.
- Шумо бештар зери оҳангҳои миллӣ суруд мехонеду либосҳои миллӣ мепӯшед, ин имиҷро худатон интихоб кардед?
- Бале, чунин имиҷро худам интихоб кардам. Дӯст медорам либоси миллӣ пӯшидан ва зери оҳанги миллӣ суруд хонданро. Либоси миллии тоҷикӣ зеботарин, қашангтарин либос аст, ки мисолаш дар дунё нест. Ҳунармандони гулдасти мо онро тавре бо нақшҳои гуногун оро медиҳанд, ки ҳар як бону мехоҳад чунин либос дошта бошад. Аз як тараф ҳунарманд хусусан овозхон ҳамеша зери таваҷҷӯҳ қарор мегирад. Таронаҳояшро хурду калон ва ҳатто аз хориҷа тамошо мекунанд. Аз ин рӯ овозхон набояд асолати худро гум кунад. Балки бо либоси миллӣ оҳангҳои миллии худамонро муаррифӣ кунад.
- Шумо аз эҷоди устодони санъати тоҷику ӯзбек гулчини таронаҳоро сурудед, ин ғояи худатон буд?
- Бале гулчин аз устодони санъати тоҷику ӯзбек ғояи худам буд. Мо аз устодони санъат таронаҳои зебою мондагори зиёд дорем. Чунин таронаҳо дар ҳар ду кишвари ҳамҷавор маҳбубият доранд. Масалан баъзе сурудҳои устодони санъати тоҷик дар Ӯзбекистон то ҳол маъруфанд ва баръакс сурудҳои устодони санъати ӯзбек дар Тоҷикистон то имрӯз вирди забонанд. Аз ин рӯ хостам гулчини таронаҳои устодони санъати тоҷику ӯзбекро хонам. Ин тарона бо суруди Ҳофизи халқии Тоҷикистон Боймуҳаммад Ниёзов оғоз шудааст.
- Мухлисонатон аз он шиква доранд, ки Нодирабегим бо чунин таронаҳои гӯшнавозу дилписандаш кам шоу-консерт баргузор мекунад. Ҳоло мухлисон аз Шумо шоу - консерти нав интизор шаванд?
- Хушбахтона имрӯзҳо дар ҳар як шаҳру навоҳии кишвар кохҳои фарҳангӣ, Қасри фарҳанг ва умуман барои баргузор кардани консертҳои пуршукӯҳ имкон ҳаст. Ният дорам албомҳои нав ба навро пешкаши мухлисон созам ва аз наздик бо якояки мухлисони азиз шинос шавам. Мухлис ба сароянда нерӯ ва барои боз ҳам эҷоди таронаҳои нав таҳрик мебахшад. Ваъда медиҳам, ки баробари имкон ёфтан шоу-консерти худро пешниҳоди мухлисони азиз месозам.
Мусоҳиб Абдуғаффор ШОДИЕВ
